door:
René Stoter
Datum:
30/1/2017
Vastelaovesgeveul…?!

Lees column in Nederlands

René, wilde geej as hard-core vastelaovesvierder un stökske schriève veur miene site euver ôw vastelaovesgeveul…? Mwah…neet gans van herte, maar stel det ut predikaat ‘hard-core vastelaovesvierder’ klop dan zoel det un kleinigheidje môtte zien. Helaas, niks is minder waor… Hoewaal ik neet weit waat de euvertreffende trap van hard-core is kin ik nogal wat minse die dao meuteloos veur in aanmerking kömme, met andere weurd ik weit zeker det ik neet de groeëtste vastelaovesgek bin. Daobeej, hoewaal doorgaons neet um ein stökske teks verlaege, euver geveul schriève blièk alles behalve un kleinigheid. Tuurlik, de Jan van Mersbergens en Sander Mattheijssens ônder ôs dreihe dao de hendjes neet veur um en auk de schrièvers van al die fantastische vastelaovesleedjes hebbe dao ôngeluifelijk vuul kieës van gebik. Ik aevel, zit al waeke te breuije um aan dit toch waal enigszins  ônderschatte verzeuk te kinne voldoon.

Opschriève zoel nog waal gaon dink ik, asse maar einmaol wets waat ut, of baeter gezag dien, geveul van vastelaovend is. Ut antwoord blièk vuul lastiger as de vraog. Van alle vastelaovesclichees die dur zien herkin ik d’r best waal un paar. En as ik zoeë truukdink dan heb ik de vastelaovend door de jaore haer auk dök anders belaef. Joeks en jen, moeij verkleid, gevönde en auk weer verlaore leefde, vrindschap, same en soms auk weer effe allein en det allemaol nog los van un paar geografische vastelaovesverschille tösse mien woeënplaats Serum en mien ‘roots’ in ut stedje van lol en plezeer. Op un inkele wintersportvakantie, wat inmiddels nimmer veur te stelle is, nao, altièd van de partie en unnen inkele kier van hièl dichtbeej. Ôzze aldste zoon as kleuterprins, ceremoniemeister beej de Venlose Boerebroèlof, adjudant. Van dun boètekant ut wat serieuzere vastelaoveswerk, maar veur mich, now ik d’r min of mièr genoodzaakt ens euver naodink, eigelik auk neet mièr dan un wies um, veural same met de minse die dich leef zien de vastelaovend te belaeve.

De roeijen draod door al die herinneringe leet inens hiel erg veur de hand. In alles wat de vastelaovend beteikent kump steeds ut woord ‘same’ truuk. Beejein zien met vrinde en bekinde. En det allemaol nog wat versterke door op tièd te beginne;

beej veurkeur op d’n 11e van d’n 11e, hoewaal beej mich thoès dan idderein zièr bedinkelik kiek as ik d’r in miene vastelaovesjas in alle vruugte op oèt trek. Zittinge, bals, recepties en oètintelik unnen daag of vièf, de vruugs dich ônderhand aaf waorum dur nog zoevuul gepraot en gezônge wuurd euver ‘dreej daag’ vastelaovend, onder un werme daeke van confetti, joeks en un paar toète beer. En dan is ut auk moeij gewaes, ut pekske kin waer in de kas en de foto’s in dun album.

Tsja, ut geveul van vastelaovend. Laote we ut maar neet moeilikker maake as ut is en ut idderein lekker veur zichzelluf laote bepaole. D’r beej zien, geneete van en met mekaar en zoeas beveurbeeld al jaorelangk wuurt gezönge…’laot maar lekker gaon zoewie ut geit’… En mien vastelaovesgeveul duit d’r vaerder neet toe, hoewaal….ik twiefel euver wao ik vandaag haer zal gaon en heb un biètje ings det ik wellich iets mis. D’r is boeremoosbal met ut altièd supergezellige boèretoèrefees van de ald-boerebroelofsgezelschappe veuraaf, maar mien geleef naefke Jesse recipieert auk as adjudant beej de jeug van de Plaggenhouwers in Grubbevors en in Serum kump strakkes auk de prins oèt….?!  En wat doon ik aan ? Ut velt auk allemaol neet mei… VASTELAOVEND SAME !

Videocredits: Zutjes aan, Zang: Joke Theeuwen & Wiel Vestjes Tekst: Wiel Hermans Muziek: Wim Roeffen